نیشنل ڈیزاسٹر مینجمنٹ اتھارٹی (این ڈی ایم اے) نے گلگت بلتستان اور آزاد کشمیر میں ممکنہ بارشوں کے باعث سیلابی صورتحال کا خدشہ ظاہر کرتے ہوئے الرٹ جاری کر دیا ہے۔
ترجمان این ڈی ایم اے کے مطابق 28 تا 31 جولائی کے دوران گلگت، سکردو، ہنزہ اور شگر سمیت گلگت بلتستان کے مختلف علاقوں میں شدید بارش متوقع ہے، جبکہ آزاد کشمیر کے مظفرآباد، وادی نیلم اور باغ میں بھی موسلا دھار بارشوں کا امکان ہے۔ ان علاقوں میں بارشوں کے باعث دریاؤں میں طغیانی اور شہری علاقوں میں سیلابی صورتحال پیدا ہو سکتی ہے۔
این ڈی ایم اے نے خبردار کیا ہے کہ پہاڑی علاقوں میں لینڈ سلائیڈنگ کا بھی شدید خدشہ ہے۔ وادی چترال، بونی اور ریشن میں بارشوں کے ساتھ گلیشیئرز کے پگھلنے سے دریائے چترال کے بہاؤ میں اضافہ ہو سکتا ہے، جس سے نشیبی علاقوں میں خطرناک صورتحال جنم لے سکتی ہے۔
ادارے نے تمام متعلقہ محکموں کو پیشگی اقدامات کی ہدایت کرتے ہوئے کہا ہے کہ ہنگامی حالات سے نمٹنے کے لیے اہلکار، مشینری اور ریسکیو ٹیمیں الرٹ رہیں۔ این ڈی ایم اے نے پی ڈی ایم ایز اور مقامی انتظامیہ کو بھی ممکنہ خطرات سے نمٹنے کے لیے بھرپور تیاری کی ہدایت جاری کر دی ہے۔
عوام سے بھی اپیل کی گئی ہے کہ وہ موسم کی صورتحال سے باخبر رہیں اور محفوظ مقامات پر منتقل ہونے کے لیے مقامی حکام کی ہدایات پر عمل کریں۔
شمالی علاقہ جات میں شاہراہوں کی بحالی کا عمل تیز، فیلڈ افسران کی چھٹیاں منسوخ
شمالی علاقہ جات میں شدید بارشوں اور کلاؤڈ برسٹ کے باعث بند ہونے والی شاہراہوں کی بحالی کا عمل تیزی سے جاری ہے۔ وزیر مواصلات عبدالعلیم خان کی ہدایت پر نیشنل ہائی وے اتھارٹی (این ایچ اے) کے حکام دن رات سرگرم ہیں۔
این ایچ اے کے مطابق مانسہرہ، ناران، جھل کھنڈ ہائی وے (N-15) اور جگلوٹ تا سکردو روٹ پر لینڈ سلائیڈنگ کے ملبے کو ہٹا دیا گیا ہے، جبکہ مزید پانچ مقامات پر صفائی کا کام جاری ہے۔ ناران سے بابوسر ٹاپ اور چلاس تک راستہ بحال کر دیا گیا ہے۔
سیکرٹری مواصلات علی شیر محسود اور چیئرمین این ایچ اے بحالی کے عمل کی خود نگرانی کر رہے ہیں۔ چیئرمین کے مطابق فیلڈ افسران کی تمام چھٹیاں منسوخ کر دی گئی ہیں اور ایمرجنسی ریسپانس پلان نافذ کر دیا گیا ہے، جبکہ بھاری مشینری چوبیس گھنٹے کام میں مصروف ہے۔