بھارت کے شہر ممبئی میں گوگل میپ کی غلط رہنمائی کے باعث ایک اور افسوسناک واقعہ پیش آیا، جہاں ایک خاتون ڈرائیور اپنی گاڑی سمیت نالے میں جاگری۔ خوش قسمتی سے خاتون کو محفوظ طریقے سے ریسکیو کرلیا گیا۔
بھارتی میڈیا رپورٹس کے مطابق، یہ واقعہ بیلاپور کے علاقے میں پیش آیا، جب متاثرہ خاتون نے گوگل میپ پر انحصار کرتے ہوئے راستہ منتخب کیا۔ نقشے نے بے بریج (Bay Bridge) کے نیچے کا راستہ دکھایا، جبکہ اصل راستہ پل کے اوپر سے جاتا تھا۔ غلط رہنمائی کے نتیجے میں گاڑی نالے میں جاگری۔
عینی شاہدین کے مطابق، حادثے کے فوری بعد وہاں موجود شہریوں اور ریسکیو ٹیم نے فوری کارروائی کرتے ہوئے خاتون کو نالے سے بحفاظت نکالا، جس کے بعد کرین کی مدد سے گاڑی کو بھی باہر نکال لیا گیا۔
گوگل میپ پر اندھا اعتماد خطرناک ثابت ہو رہا ہے
یہ واقعہ گوگل میپ پر اندھا اعتماد کرنے سے پیش آنے والے خطرات کا ایک اور افسوسناک ثبوت ہے۔ اس سے قبل بھی بھارت میں کئی شہری ایسے حادثات کا شکار ہوچکے ہیں۔
نومبر 2023 میں بھی اسی نوعیت کا ایک ہولناک واقعہ پیش آیا تھا، جب ایک گاڑی گوگل میپ کے بتائے گئے راستے پر سفر کرتے ہوئے ایک زیر تعمیر پل سے نیچے جاگری، جس کے نتیجے میں 3 افراد جان کی بازی ہار گئے۔
ماہرین اور سوشل میڈیا صارفین کی جانب سے ایک بار پھر گوگل میپ پر اندھا اعتماد نہ کرنے، خاص طور پر اجنبی یا پیچیدہ علاقوں میں، مقامی نشان دہی اور ہوشیاری کے ساتھ سفر کرنے کی تاکید کی جا رہی ہے۔