پاکستان شوبز انڈسٹری کی معروف اداکارہ سارہ خان نے فیمینزم پر اپنی رائے کی وضاحت کرتے ہوئے کہا ہے کہ جب کہتی ہوں کہ میں فیمنسٹ نہیں ہیں تو اس کا مطلب یہ نہیں کہ برابری پر یقین نہیں رکھتی میں برابری کے مواقع، برابری کے حقوق اور عورتوں کے لیے برابری کی سہولیات پر مکمل یقین رکھتی ہوں لیکن میرا مطلب یہ ہے کہ میں آج کل کی فیمنسٹ نہیں بلکہ ایک اصل، حقیقی اور پرانی فیمنسٹ ہوں۔
فوٹو اینڈ ویڈیو شیئرنگ ایپ انسٹاگرام پر اسٹوری اپلوڈ کرتے ہوئے ان کا کہنا تھا کہ میں ایسی فیمنسٹ ہوں جو یہ مانتی ہے کہ عورت کی طاقت مرد کی نقل کرنے میں نہیں، بلکہ اپنی نسوانی فطرت کو اپنانے میں ہے۔
سارہ خان کا کہنا تھا کہ عورتوں کو مشینوں کی طرح کام کرنے کے لیے نہیں نسلیں پروان چڑھانے، محبت کرنے اور دنیا کو سنوارنے کے لیے بنایا گیا ہے۔ حضرت خدیجہ (رضی اللہ عنہا) کو دیکھیں جو ایک کامیاب تاجرہ، مگر وقار، توازن اور عظمت کی علامت تھیں۔ انہوں نے دنیاوی کامیابی حاصل کی مگر خاندان کی قربانی، محبت اور خدمت کو کبھی نظرانداز نہ کیا، اور نہ ہی اپنے وجود کو کسی بیرونی شناخت میں گم کیا۔
ان کا کہنا تھا کہ مجھے سمجھ نہیں آتا کہ یہ سوچ کیوں پروان چڑھ رہی ہے کہ عورت کا خواب صرف دفتر میں نوکری کرنا ہے، مگر جب وہ اپنے شوہر کے لیے ناشتہ بناتی ہے یا بچوں کی دیکھ بھال کرتی ہے تو اسے کمتر سمجھا جاتا ہے؟ جب کہ وہی محبت اور خدمت عورت کو عظیم بناتی ہے۔
اداکارہ نے کہا کہ عورت کا کردار مقدس ہے۔ وہ تعلیم یافتہ، بااختیار اور مضبوط ہو سکتی ہے، مگر پھر بھی نرم، پُر وقار اور جڑی ہوئی ہوتی ہے۔ اسے کسی ایک چیز کا انتخاب کرنے کی ضرورت نہیں۔ وہ سب کچھ ہو سکتی ہے جو وہ بننا چاہے۔
ان کا کہنا تھا کہ فیمنزم کو نسوانیت کو مٹانے کا ذریعہ نہیں بننا چاہیے۔ ہمیں اپنے فیصلے اپنی فطرت، ممتا، نرمی اور طاقت کی بنیاد پر کرنے چاہئیں۔ یہ ایک خدائی طاقت ہے۔ آئیے ہم اسے کسی ایسی طاقت کے نظریے کے لیے نہ کھو بیٹھیں، جو ہمیں ہماری اصل سے جدا کر دے۔
یاد رہے کہ کچھ دن قبل اداکارہ سارہ خان کا ایک ویڈیو کلپ وائرل ہوا تھا جس میں انہوں نے فیمنزم سے متعلق کہا تھا کہ وہ فیمنسٹ نہیں ہیں، مردوں کے کام مردوں پر چھوڑ دینا ہی بہتر ہے اور وہ نہیں چاہتی ہیں وہ بل بھرنے کے لیے لمبی لائنوں میں لگیں بلکہ وہ گھر پر رہ کر سکون کرنا پسند کرتی ہیں۔ اس بیان پر صارفین کی جانب سے انہیں خوب ٹرول کیا گیا تھا۔
واضح رہے کہ سارہ خان شاندار اور باصلاحیت اداکارہ ہیں اور وہ مقبول ڈراموں میں اپنی عمدہ ایکٹنگ کے باعث جانی جاتی ہیں۔ ان ڈراموں میں ثبات، رقٓص بسمل، لاپتا، بیلا پور کی ڈائن، نمک حرام اور ہم تم شامل ہیں۔وہ ان دنوں اپنے ڈرامہ سیریل ’شیر‘ میں دانش تیمور کے ساتھ شاندار اداکاری پر خوب داد سمیٹ رہی ہیں۔
سارہ خان کے انسٹاگرام پر 1.24 کروڑ فالوورز ہیں، جو ان کی مقبولیت کا ثبوت ہے۔ وہ گلوکار فلک شبیر کے ساتھ خوشگوار ازدواجی زندگی گزار رہی ہیں، اور یہ دونوں ایک نہایت خوبصورت اور پسندیدہ مشہور جوڑی سمجھے جاتے ہیں۔