معروف اداکار و ہدایتکار احمد حسن نے اپنی ازدواجی زندگی کے دلچسپ پہلوؤں پر روشنی ڈالتے ہوئے انکشاف کیا ہے کہ وہ ہر رات سونے سے پہلے اپنی اہلیہ، اداکارہ نوشین احمد کے پاؤں دباتے ہیں۔ ان کا کہنا تھا کہ یہ ان کی روزمرہ کی عادت بن چکی ہے، جو نہ صرف محبت بلکہ ذمہ داری کا مظہر بھی ہے۔
واسع چوہدری کے شو میں اپنی اہلیہ کے ہمراہ شرکت کرتے ہوئے احمد حسن نے کئی دلچسپ اور ذاتی نوعیت کے انکشافات کیے۔ گفتگو کے دوران جب ان سے ان کی پہلی ملاقات کے بارے میں پوچھا گیا تو انہوں نے بتایا کہ ان کی پہلی ملاقات ڈرامہ ’پیا کا گھر پیارا لگے‘ کے سیٹ پر ہوئی۔ نوشین میک اپ کروا رہی تھیں، اور جیسے ہی میں نے ان پر پہلی نظر ڈالی، وہ دل میں اتر گئیں۔
احمد حسن نے مزید کہا کہ اگلے ہی دن انہوں نے گفتگو کے دوران نوشین سے دریافت کیا کہ کیا ان کی منگنی ہو چکی ہے؟ اور جب پتہ چلا کہ وہ غیر منگنی شدہ ہیں تو انہوں نے بغیر کسی تاخیر کے شادی کی پیشکش کر دی۔ حیران کن طور پر، صرف ایک ہفتے میں دونوں رشتہ ازدواج میں منسلک ہو گئے۔
’تقریب میں دیر سے تیار میں ہوتا ہوں‘
اداکار نے ہنستے ہوئے کہا کہ جب بھی دونوں کسی تقریب میں شرکت کے لیے جاتے ہیں، تو تیار ہونے میں زیادہ وقت وہ خود لیتے ہیں کیونکہ وہ اہلیہ کے تقریباً تیار ہونے کے بعد ہی خود تیار ہونے کا عمل شروع کرتے ہیں۔
سیٹ پر شوہر اور ہدایتکار کا توازن
ایک حالیہ ڈرامے میں ہدایتکار کی حیثیت سے کام کرتے ہوئے احمد حسن نے نوشین کو بطور اداکارہ کاسٹ کیا۔ انہوں نے کہا کہ اگرچہ وہ اپنی اہلیہ سے محبت کرتے ہیں، مگر سیٹ پر پروفیشنلزم برقرار رکھتے ہیں:
’چونکہ سیٹ پر سینئر اداکار بھی موجود ہوتے تھے، اس لیے کسی کو یہ محسوس نہ ہو کہ میں نوشین کی طرفداری کر رہا ہوں، اس لیے کبھی کبھار مجھے انہیں ڈانٹنا بھی پڑتا تھا۔ مگر دل سے میں ہمیشہ نرم ہی رہتا ہوں۔‘
’فرماں بردار شوہر ہوں‘
اپنی نجی زندگی کے حوالے سے گفتگو کرتے ہوئے احمد حسن نے فخریہ انداز میں کہا:
’میں ایک فرماں بردار شوہر ہوں، روز رات کو سونے سے پہلے اپنی بیوی کے پاؤں دباتا ہوں۔‘
اس پر نوشین احمد نے مسکراتے ہوئے کہا:
’ظاہر ہے، وہ میرے شوہر ہیں تو ایسا تو کریں گے ہی۔‘
احمد حسن اور نوشین احمد کی جوڑی نہ صرف اسکرین پر بلکہ ذاتی زندگی میں بھی باہمی احترام، محبت اور سمجھوتے کی خوبصورت مثال بن کر سامنے آئی ہے۔ اس انٹرویو کے بعد سوشل میڈیا پر مداحوں کی جانب سے جوڑے کو خوب سراہا جا رہا ہے۔