ٹیسلا نے 21 جولائی 2025 کو ہالی ووڈ کے سانتا مونی کا بولیوارڈ پر اپنا طویل انتظار کے بعد تیار ہونے والا ریٹرو طرز کا ڈائنر اور سپر چارجنگ اسٹیشن باضابطہ طور پر کھول دیا۔
یہ 2 منزلہ 9,300 مربع فٹ پر مشتمل عمارت جدید ٹیکنالوجی اور 1950 کی دہائی کی امریکی ثقافت کا حسین امتزاج پیش کرتی ہے، جہاں کھانے، تفریح اور تیز ترین گاڑی چارجنگ کی سہولت ایک ہی جگہ پر دستیاب ہے۔
ڈائنر کو 50 کی دہائی کے ڈرائیو اِن طرز پر سجایا گیا ہے، جس میں نیون لائٹس، کروم ڈیزائن اور خلائی دور کی طرز کی خمیدہ ساخت شامل ہے۔
چھت پر دو 45 فٹ لمبی LED اسکرینیں نصب ہیں، جہاں سے فیملی فرینڈلی اور کلاسیکی فلمیں دکھائی جاتی ہیں۔ جیو فینسنگ ٹیکنالوجی کے ذریعے فلموں کی آڈیو براہِ راست گاڑیوں کے اسپیکرز میں نشر ہوتی ہے۔
ڈائنر میں مہمانوں کو امریکی طرز کے روایتی کھانے پیش کیے جاتے ہیں جیسے کہ برگر، وِنگز، ہاٹ ڈاگز، ملک شیک اور خاص ٹونا میلٹ۔ کھانے کو ٹیسلا کے برانڈڈ پیکجنگ میں پیش کیا جاتا ہے، جن میں کچھ پیکٹ منی ایچر سائبر ٹرک کی شکل میں بھی ہوتے ہیں۔
مہمان ٹچ اسکرین کیوسک یا اپنی ٹیسلا گاڑیوں کے ڈیش بورڈ کے ذریعے آرڈر دے سکتے ہیں، جو اس ڈائنر کے سسٹم سے جُڑے ہوتے ہیں۔
افتتاحی تقریب میں ٹیسلا کے مداحوں اور الیکٹرک گاڑیوں کے شوقین افراد کی طویل قطاریں دیکھی گئیں۔
ڈائنر کے دروازے شام 4:20 بجے کھولے گئے، جو ایک مخصوص وقت ہے جسے ایلون مسک سے منسوب مزاحیہ حوالہ بھی سمجھا جاتا ہے۔
اس موقع پر رولر اسکیٹس پر سروس کرنے والے ویٹرز اور ٹیسلا کے Optimus ہیومینوئڈ روبوٹس کی جانب سے پاپ کارن جیسی ہلکی پھلکی اشیاء کی ترسیل بھی دیکھی گئی۔
ٹیسلا کے سی ای او ایلون مسک نے اس مقام کو ’لاس اینجلس کے سب سے زبردست مقامات میں سے ایک‘ قرار دیا اور عندیہ دیا کہ مستقبل میں دیگر سپر چارجنگ اسٹیشنز پر بھی اسی طرز کے ڈائنر قائم کیے جائیں گے۔