سابق ٹیسٹ کرکٹر دانش کنیریا نے بھارت کی جانب سے کھیل کو سیاسی مقاصد کے لیے استعمال کرنے پر سخت ردعمل دیا ہے۔ سوشل میڈیا پر جاری اپنے بیان میں دانش کنیریا نے ورلڈ چمپیئنز لیگ (WCL) کے بائیکاٹ اور ایشیا کپ میں پاکستان سے مقابلے کو منافقانہ رویہ قرار دیا۔
دانش کنیریا نے ایکس پوسٹ میں کہا کہ بھارتی کھلاڑیوں نے ورلڈ چمپیئنز لیگ (WCL) میں شرکت سے انکار کرتے ہوئے اسے قومی فریضہ قرار دیا، لیکن اب جب ایشیا کپ میں پاکستان کے خلاف میچ کھیلنا ہے تو یہ بالکل قابل قبول ہے؟ اگر پاکستان سے کرکٹ کھیلنا ٹھیک ہے، تو پھر ورلڈ چمپیئنز لیگ (WCL) میں بھی کھیلنا چاہیے تھا۔
انہوں نے مزید کہا کہ جب دل چاہے قوم پرستی کا راگ الاپنا، اور جب فائدہ نظر آئے تو سب کچھ بھول جانا، یہ رویہ قابل افسوس ہے۔ کھیل کو کھیل ہی رہنے دیں، اسے پروپیگنڈا نہ بنائیں۔
واضح رہے کہ حالیہ دنوں بھارت نے بعض بین الاقوامی کھیلوں میں پاکستان کی شرکت یا شمولیت پر اعتراضات اٹھائے تھے، تاہم ایشیا کپ جیسے اہم ٹورنامنٹ میں روایتی حریف پاکستان کے ساتھ میچ کھیلنے کو تیار ہے، جس پر دانش کنیریا سمیت متعدد حلقوں نے سوالات اٹھائے ہیں۔